| 印度之旅 29.3.2009 第二天 (上) 一早醒來, 發現酒店廁所外係白鴿居住地! 去廁所既時候好冇安全感, 一時拍翼聲, 一時”唂唂”聲~ 之後去左食早餐~ 早餐時間絕對唔可以享受.. 一入間「房」有一大陣煤氣味~ 仲要醃眼架! 「嗱」眼「嗱」到咇眼水.. 而食物就硬崩崩, 應該鬆脆可口既薯餅都硬到石頭咁! 認真唔得! 襯仲有少少自由時間, 我地就走到酒店對面~ 穿過一條旁邊佈滿垃圾的小巷.. 行左出一個海灘!? 一個比清水灣長五倍有多既海灘! 當地人都好投入呢個環境~ 仲有好多人玩沙灘「?球」… (?係因為佢地玩一種類似板球加手球既運動, 恕我見識少, 唔知係咩~) 呢個地點真係有種「柳暗花明又一村」既感覺.. 
係香港, 要去海灘真係好困難.. 總係要搭好耐車先去到.. 而呢個海灘, 我諗孟買市區既人應該半個鐘左右就到.. 係一個好貼近市民既地方! 感受完陽光與海灘後, 就開始係孟買度「精華遊花園」~ 第一站係全世界最大既洗衣場!  
呢個地方, 係一個有好多人用手洗衫既地方~ 佢地起左好多個小水池, 大約5呎乘5呎! 一邊注入清水, 一邊有人將衣服”撻”在石墩上~ 唔好覺得恐怖, 但係印度有部分小醫院係會將佢地既污物送去處理! 不過係一個好地道既地方~ (領隊話係因為一百萬零一夜上左先新增既景點!) 影完相就去左海濱大道~ 
仲撞到印度人拍片, 見識到「寶來活」威力! (其實都冇乜特別~ 不過個印度汪阿姐好搞笑, 包住個頭啱啱焗左油既頭行去試位) 講返一個咁長既海濱, 其實有段古: 話說孟買本來係七個小島, 但因為英國得到主權後一直都冇發展.. 佢就用左一個超平既價錢租左俾東印度公司~ 係唔係好熟口面呢? 因為你世史一定有讀過! (賣鴉片俾中國個間公司) 東印用左38年時間移山填海.. 令孟買最終成為一大個半島, 而且得以發展! 繼續旅程就去左孟買大學同最高法院~
之後就去號稱亞洲甚至全世界客量最高既車站: 維多利亞火車站! 
不過都只係外面影相.. (仲要係遙遠既大馬路對面!) 一個十分有裝飾性的車站.. 不過一個咁有歷史背景既車站都係逃不過”去殖民”運動! 英式名: 維多利亞火車站 已經改為“一個印度民族英雄既名”火車站~ 影完之後實在係無癮.. 之後又去另一個地方: 威爾斯王子博物館.. Again又係只係外面影個相咁.. 呢個博物館係因為威爾斯王子成立左一個基金會去保存印度文化! 而之後亦相繼開放俾印度居民入內參觀~ 我相信入面既館藏應該好豐富, 可惜無緣入內參觀! 印度之門亦係另一個富有英國文化背景的地方.. 
佢就正正係印度版既皇后碼頭.. 英皇佐治五世(好似係..)當年就係呢度門外既碼頭上岸探訪印度! 而最後一隊英軍撤出印度亦係門外碼頭上船! 而家門外的碼頭已經成為左一個公眾碼頭前往象島.. (唔好問我象島有咩~ 因為我都冇去過!) 而印度之門對面就係著名既泰哈瑪姬宮殿酒店! (待續..) |
