| 印度之旅 28.03.2009 第一天 期待已久的印度之旅終於到喇! 今次跟團所以冇乜特別準備~ 這一天的行程其實只是半天的機程, 因為四點幾才在機場集合.. 原本想係機場食個Burger King先上機~ 不過可惜既係, 我地一集合就俾領隊趕入閘.. 係機場入左閘真係冇啖好食.. 搵野填肚期間, 買左兩件美式曲奇, 鬆餅同熱朱古力! 都幾唔錯, 杯熱朱古力好香好滑, 而且有冰涼既忌廉同一粒粒棉花糖係面! 為左趕搭飛機 (領隊又話準時開機會早到.. 就奇)~ 好急咁係48號閘, 即機場最角落位影左出發前照就上機喇! 
機場之最尖端 今次呢間航空公司叫捷特(Jet Air), 都唔錯架 
JET AIRWAYS 
我媽, 我跟姨媽的自拍! 架機好新淨, 座位都算舒服, 亦要讚下個娛樂系統~ 每個人都有一個獨立的超大輕觸式屏幕.. 上映既電影又新, 睇左”換命謊言” (Changeling)同占士邦! 唯一真係麻麻既係食物.. 一舊汁煮倉魚都煮到好難食! 另外, 服務員成程都好忙咁, 講野有少少冇禮貌.. 呢一樣野都值得改善! 此外, 雖然我冇乜去廁所, 但一去就見到塞左~ 仲要有幾格都塞.. (你諗下, 一架飛機有幾多格廁所丫? 我諗都塞左一半..) 六個小時之後, 終於見到黑夜中既孟買~ 好大既一個城市! 入境過程都好順利, 冇乜阻滯~ 唔見有之前上其他blog寫既亂開行李箱, 亂收稅等.. 但最最最最最大問題係: 咁大個城市既國際機場.. 竟然冇冷氣加勁多蚊同烏蠅, 係好多! 兌換盧布亦係今次團既熱話~ 1美元兌47-49盧布左右.. 出閘前後其實相差唔多, 不過出閘前係換多少少既! 之後坐上旅行社安排既旅遊巴, 到達下塌既酒店! 
酒店外的孟買清晨 呢間酒店真係麻麻~ 疑似十年前大陸酒店既標準! 門面細細, 昏黃既燈光~ (仲要一大班團友入左去, 職員先記得開燈!) 係等check-in既時候.. 酒店安排我地去”參觀”第二日早餐用膳地點! 經過左一個又一個傳出臭味既”花園”.. 去到另一座”公寓”, 入左一個房.. 竟然就係傳說中我地團包左既”餐廳”.. 好噴血呀! 個職員仲要拍另外一間房既門~ 拍左好耐, 我懷疑係佢地偷懶既房.. 不過整間酒店散發一股”霉”味! 但又有一種要自己開門既唐樓式升降機~ 
傳說中的升降機 (佢移動緊既時候係會夾手指.. 如果你頑皮既話!) 領隊李小姐應該係新手, 因為佢講野冇乜條理.. 有時講左一大堆野都係冇point既.. 成日掛住笑!
至於孟買既第一印象, 的士係我第一樣覺得有趣既事物~ 黑搭黃 + 疑似Mini cooper外貌, 復古到不行! 
超復古的士, I like it! 而孟買既建築物都似深水埗舊區~ 但就比唐樓多左少少裝飾外! 另外就係人.. 人, 狗, 牛都會隨街而睡, 與垃圾, 烏蠅為伴! |
